சென்னை உள்ளிட்ட 6 இடங்களில் 12 பகுதிகளில் சோதனை – 8 சொகுசு கார்கள், 7.4 கிலோ தங்க நகைகள், ₹80 கோடி மதிப்பிலான பங்குகள் பறிமுதல் – ஏற்கனவே கைது செய்யப்பட்ட நிறுவனத் தலைவர் பிரேம்குமார்!
கேரளாவைத் தலைமையிடமாகக் கொண்டு தமிழ்நாடு, புதுச்சேரி உள்ளிட்ட பகுதிகளில் செயல்பட்டு வரும் பாரத்லஜ்னா மல்டி ஸ்டேட் ஹவுசிங் கூட்டுறவு சங்கத்தில்பொதுமக்கள் டெபாசிட் செய்த பணத்தை முறைகேடாகப் பயன்படுத்தி, பல கோடி ரூபாய் மதிப்பிலான சொத்துகளை வாங்கியதாக எழுந்த புகாரில் அமலாக்கத்துறை அதிரடி நடவடிக்கை எடுத்துள்ளது.இந்த விவகாரத்தில், நிறுவனத்தின் நிறுவனர் மற்றும் தலைவரான ஆர். பிரேம்குமாருக்குத் தொடர்புடைய இடங்களில் நடத்தப்பட்ட சோதனையில், மொத்தம் ₹103 கோடி மதிப்பிலான சொத்துகளை அமலாக்கத்துறை முடக்கியுள்ளது.
கேரள மாநிலம் கொச்சியில் உள்ள அமலாக்கத்துறை மண்டல அலுவலக அதிகாரிகள், பணமோசடி தடுப்புச் சட்டத்தின் (PMLA), 2002 கீழ் நவம்பர் 4-ம் தேதி இந்தச் சோதனையை மேற்கொண்டனர்.கேரளாவின் எர்ணாகுளம், கோழிக்கோடு, திருச்சூர், திருவனந்தபுரம், மூணாறு மற்றும் சென்னையில் என மொத்தம் 12 இடங்களில் சோதனை நடைபெற்றது.பாரத்லஜ்னா கூட்டுறவு சங்கத்தின் நிறுவனர் ஆர். பிரேம்குமார், பொதுமக்களிடமிருந்து சங்கம் திரட்டிய பணத்தைத் தனது குடும்பத்தினர் மற்றும் உறவினர்களின் வங்கிக் கணக்குகளுக்கு மாற்றி, அவர்களின் பெயர்களில் அசையும் மற்றும் அசையாச் சொத்துகளை வாங்கியதாகக் குற்றம்சாட்டப்பட்டுள்ளது.
கேரள காவல்துறையின் குற்றப்பிரிவு பதிவு செய்த முதல் தகவல் அறிக்கையின் அடிப்படையில் அமலாக்கத்துறை விசாரணையைத் தொடங்கியது.சங்கத்தின் நிறுவன உறுப்பினரும், அதன் உண்மையான தலைவர் மற்றும் நிர்வாக இயக்குநராகச் செயல்பட்டவருமான பிரேம்குமார், தனது செல்வாக்கைப் பயன்படுத்தி பொதுமக்களிடமிருந்து பெறப்பட்ட பல கோடி ரூபாய் டெபாசிட் பணத்தைத் தனது குடும்பத்தினரின் கணக்குகளுக்கு மாற்றியதாகப் புகாரில் தெரிவிக்கப்பட்டுள்ளது.மேலும், சங்கத்திற்குச் சொந்தமான சொத்துகளை அடமானம் வைத்து நிதி நிறுவனங்களிடமிருந்து கடன் பெற்று, அந்தப் பணத்தையும் தனது குடும்பத்தினர் பெயரில் சொத்துகள் வாங்குவதற்குப் பயன்படுத்தியதாகக் கூறப்படுகிறது.
அமலாக்கத்துறையின் விசாரணையில், பிரேம்குமாரும் அவருடன் தொடர்புடையவர்களும் சுமார் 320 வங்கிக் கணக்குகளைப் பயன்படுத்தி பணப் பரிமாற்றம் செய்திருப்பது தெரியவந்துள்ளது.சங்கத்தின் பணத்தைப் பல்வேறு கணக்குகள் வழியாக மாற்றி, அதன் உண்மையான மூலத்தைக் கண்டறிய முடியாத வகையில் மறைத்ததாகவும் அமலாக்கத்துறை தெரிவித்துள்ளது.இந்த முறைகேட்டின் மூலம் பெறப்பட்டதாகக் கருதப்படும் குற்ற வருவாய் சுமார் ₹80 கோடி என கேரள காவல்துறையின் முதல் தகவல் அறிக்கையில் குறிப்பிடப்பட்டுள்ளது. ஆனால், முறைகேடு செய்யப்பட்ட தொகை பல நூறு கோடி ரூபாயாக இருக்கலாம் என்றும், அதன் துல்லியமான மதிப்பைக் கணக்கிடும் பணி தொடர்ந்து நடைபெற்று வருவதாகவும் அமலாக்கத்துறை தெரிவித்துள்ளது.
அமலாக்கத்துறையின் சோதனையின்போது, பிரேம்குமார் மற்றும் அவருடன் தொடர்புடையவர்களின் பெயர்களில் இருந்ததாகக் கூறப்படும் சொத்துகள் கண்டறியப்பட்டுள்ளன.இவற்றின் மொத்த மதிப்பு ₹103 கோடி எனக் கணக்கிடப்பட்டுள்ளது. இந்தச் சொத்துகளை அமலாக்கத்துறை பறிமுதல் செய்தும் முடக்கியும் நடவடிக்கை எடுத்துள்ளது.
இந்த விவகாரத்தில் கேரள காவல்துறையின் குற்றப்பிரிவு பொருளாதாரக் குற்றப்பிரிவு போலீஸார், கடந்த அக்டோபர் 29-ம் தேதி சென்னையில் உள்ள நுங்கம்பாக்கம் பகுதியில் பிரேம்குமாரைக் கைது செய்தனர்.அவரைக் கோழிக்கோட்டுக்கு அழைத்துச் சென்ற போலீஸார், நீதிமன்றத்தில் ஆஜர்படுத்தினர். ஆனால், கைது செய்வதற்கான கட்டாய சட்ட நடைமுறைகள் முறையாகப் பின்பற்றப்படவில்லை எனப் பிரேம்குமார் தரப்பு வழக்கறிஞர்கள் வாதிட்டதைத் தொடர்ந்து, அக்டோபர் 30-ம் தேதி அவருக்கு நீதிமன்றம் ஜாமீன் வழங்கியது.கைது நடவடிக்கையில் ஏற்பட்ட நடைமுறைப் பிழை காரணமாகவே அவர் விடுவிக்கப்பட்டதாகவும், மீண்டும் கைது செய்ய நீதிமன்ற அனுமதி கோர இருப்பதாகவும் குற்றப்பிரிவு போலீஸார் தெரிவித்திருந்தனர்.இதற்கிடையே, இடுக்கி மாவட்டத்தைச் சேர்ந்த பெண் ஒருவர் அளித்த புகாரின் அடிப்படையில், ₹1.6 கோடி மோசடி செய்ததாக பிரேம்குமார் மீது அக்டோபர் 29-ம் தேதி கோதமங்கலம் காவல் நிலையத்திலும் தனியாக வழக்குப் பதிவு செய்யப்பட்டது. 30 சதவீதத்துக்கும் அதிகமான கமிஷன் தருவதாகக் கூறி, நிறுவனத்தின் டெபாசிட் பத்திரங்கள் மூலம் தன்னிடம் பணம் பெற்றதாக அந்தப் பெண் புகார் அளித்துள்ளார்.இதற்கிடையே, தங்கள் நிறுவனம் பொதுமக்களின் டெபாசிட் பணத்தைத் திருப்பிச் செலுத்துவதில் எந்தப் பிரச்சினையும் இல்லை என்றும், நிறுவனத்தின் சொத்துகளின் மதிப்பு டெபாசிட்தாரர்களுக்குச் செலுத்த வேண்டிய தொகையைவிட அதிகம் என்றும் பாரத்லஜ்னா நிறுவன நிர்வாகிகள் தெரிவித்துள்ளனர். மேலும், தங்கள் கணக்குகள் முறையாகத் தணிக்கை செய்யப்பட்டு வருவதாகவும், பிரேம்குமாருக்கு எதிரான நடவடிக்கைகள் சட்டவிரோதமானவை என்றும் நிறுவனம் தரப்பில் மறுப்பு தெரிவிக்கப்பட்டுள்ளது.
இந்த நிலையில், பொதுமக்களின் டெபாசிட் பணம் எவ்வளவு முறைகேடாகப் பயன்படுத்தப்பட்டுள்ளது, அதில் தொடர்புடைய மற்ற நபர்கள் யார், சொத்துகள் வாங்கப்பட்ட விதம் என்ன என்பது குறித்து அமலாக்கத்துறை தொடர்ந்து விசாரணை நடத்தி வருகிறது.