நாட்டின் மிக உயர்ந்த அணுசக்தி ஒழுங்குமுறை அமைப்பு, சிறிய மாடுலர் உலைகளுக்கும் (எஸ்.எம்.ஆர்s), பெரிய அணு உலைகளுக்குப் பயன்படுத்தப்படும் அதே கடுமையான பாதுகாப்பு மற்றும் உரிமம் வழங்கும் தேவைகளையே தொடர்ந்து பராமரிக்கும் என்று இதழுக்குத் தெரிய வந்துள்ளது.
சிறிய மாடுலர் உலைகள் (எஸ்.எம்.ஆர்s) அவற்றின் மேம்பட்ட வடிவமைப்புகள் மற்றும் செயலற்ற பாதுகாப்பு அமைப்புகள் (Passive safety systems) காரணமாக, வழக்கமான பெரிய உலைகளுக்குப் பாதுகாப்பான மாற்றாகத் தொடர்ந்து முன்வைக்கப்பட்டு வரும் வேளையிலும் இந்த முடிவு எடுக்கப்பட்டுள்ளது. நாட்டின் கடுமையான கட்டுப்பாடுகளைக் கொண்ட சிவில் அணுசக்தித் துறையைத் தனியார் பங்களிப்பிற்குத் திறந்துவிட்ட ‘சாந்தி சட்டத்தின் கீழ், அதற்கான விதிமுறைகளை அரசாங்கம் தற்போது தயார் செய்து வருகிறது.
ஒரு யூனிட்டிற்கு 30 மெகாவாட் மின்சாரம்முதல் 300 மெகாவாட் மின்சாரம் வரையிலான உற்பத்தித் திறனைக் கொண்டுள்ள இந்த சிறிய உலைகள் (எஸ்.எம்.ஆர்s), பெருமளவிலான குறைந்த கார்பன் மின்சாரத்தை 24 மணி நேரமும் உற்பத்தி செய்யும் திறன் கொண்டவை என்பதால், எஃகு, அலுமினியம் மற்றும் சிமெண்ட் போன்ற அதிக ஆற்றல் தேவைப்படும் துறைகளை கார்பன் அற்றதாக மாற்றுவதற்கான ஒரு நம்பிக்கைக்குரிய விருப்பமாகப் பார்க்கப்படுகின்றன.அணுசக்தித் துறையில் தனியார் துறையின் பங்களிப்பை ஊக்குவிப்பதற்காக ‘சாந்தி’ சட்டத்தில் எடுக்கப்பட்டு வரும் தீவிர முயற்சிகளைக் கருத்தில் கொண்டு பார்க்கும்போது, ஒழுங்குமுறை அமைப்பின் இந்த நிலைப்பாடு மிகவும் முக்கியத்துவம் வாய்ந்ததாகக் கருதப்படுகிறது.இத்துறையில் உள்நாட்டில் நுழையவிருக்கும் பெரும்பாலான புதிய நிறுவனங்களுக்கு அணுசக்தி நிலையங்களை இயக்கிய அனுபவம் இல்லை என்பதால், இத்தகைய கடுமையான பாதுகாப்பு மற்றும் உரிமம் வழங்கும் தேவைகள் அவசியமாகக் கருதப்படுகின்றன.கடந்த 2025 டிசம்பர் 21 அன்று குடியரசுத் தலைவரின் ஒப்புதலைப் பெற்ற ‘சாந்தி’ சட்டம், மத்திய அரசின் உரிமம் மற்றும் நாட்டின் அணுசக்தி ஒழுங்குமுறை அமைப்பான ‘அணுசக்தி ஒழுங்குமுறை வாரியத்தின்’ (ஏ.இ.ஆர்.பி) பாதுகாப்பு அனுமதியுடன், ஒரு அணுசக்தி நிலையத்தை நிறுவுவதற்கும், அல்லது அணுசக்தியின் உற்பத்தி, பயன்பாடு மற்றும் அகற்றுதல் போன்ற செயல்பாடுகளை மேற்கொள்வதற்கும் தனியார் துறை பங்களிப்பைத் தாராளமாக அனுமதிக்கிறது.
இந்த அனுபவமின்மைப் பிரச்சினையை எதிர்கொள்ள, புதிய நிறுவனங்களுக்கு உரிமங்களை வழங்குவதற்கான ஒரு முன்நிபந்தனையாக, வெளிநாட்டு அல்லது உள்நாட்டுத் தொழில்நுட்ப வழங்குநர்களிடமிருந்து வடிவமைப்பு ஆதரவு பெறப்பட வேண்டும் என்று ஒழுங்குமுறை அமைப்பு கருதுகிறது. அணு மின் நிலையத்திற்கான உரிமத்தைப் பெற விரும்பும் எந்தவொரு நிறுவனமும், தாங்கள் எந்தத் தொழில்நுட்ப வழங்குநரிடமிருந்து தொழில்நுட்பத்தைக் கொண்டு வருகிறார்களோ, அவர்களுடன் அத்தொழில்நுட்பத்தைப் பராமரிக்கவும், செயல்பாட்டு அளவுருக்கள் குறித்து தங்களின் உலை இயக்குநர்களுக்குப் பயிற்சி அளிக்கவும் ஒரு ஒப்பந்தத்தைக் கொண்டிருக்க வேண்டும். அத்தகைய ஏற்பாடு இல்லாத பட்சத்தில், எந்தவொரு நிறுவனத்திற்கும் உரிமம் வழங்கப்பட மாட்டாது என்று வட்டாரங்கள் தி இந்தியன் எக்ஸ்பிரஸ் இதழுக்குக் சுட்டிக்காட்டியுள்ளன.ஒரு நிறுவனம் தொழில்நுட்ப வழங்குநருடன் தேவையான ஒப்பந்தங்களை ஏற்படுத்தி உரிமத்தைப் பெற்ற பிறகும், ஆலை இயக்குநர்கள் தொழில்நுட்ப வழங்குநரிடமிருந்து தேவையான பயிற்சிகளைப் பெறுகிறார்களா என்பது உள்ளிட்ட இணக்கங்களை ஒழுங்குமுறை அமைப்பு ஆண்டுதோறும் கண்காணிக்கும்.
இந்தியாவின் சிறிய அணு உலை (எஸ்.எம்.ஆர்) சுற்றுச்சூழல் அமைப்பு இன்னும் ஆரம்பக் கட்டத்தில் இருப்பதும், இந்த சிறிய உலைகளுக்கான உள்நாட்டுக் கொள்கை ஊக்கமளிக்கப்பட்டு வருவதும் உண்மையே என்றாலும், உரிமம் வழங்கும் கட்டமைப்பு என்பது எஸ்.எம்.ஆர்-கள் மற்றும் பெரிய உலைகள் ஆகிய இரண்டிற்கும் ஒரே மாதிரியாகவே இருக்கும் என்று எதிர்பார்க்கப்படுகிறது. இந்தியாவின் அணுமின் திட்டம் இதுவரை உள்நாட்டிலேயே தயாரிக்கப்பட்ட அழுத்தப்பட்ட கனநீர் உலைகளை (PHWRs) நம்பியே அமைந்துள்ளது, இவை கனநீரைக் குளிர்விப்பானாகவும் மட்டுப்படுத்தியாகவும் மற்றும் இயற்கை யுரேனியத்தை எரிபொருளாகவும் பயன்படுத்துகின்றன.
நாட்டின் அணுசக்தி விரிவாக்கத் திட்டங்களின் முதுகெலும்பாக இந்த கனநீர் உலைகள் (PHWRs) தொடர்ந்து நீடிக்கும் என்றாலும், சிறிய அணு உலைகள் (எஸ்.எம்.ஆர்-கள்) தொழில்துறை கார்பன் நீக்கத்திற்கு உதவக்கூடிய ஒரு நம்பிக்கைக்குரிய தொழில்நுட்பமாக அதிகளவில் பார்க்கப்படுகின்றன. பெரிய இலகு நீர் உலைகளின் அதிகப்படியான திட்டச் செலவுகள் இந்தியாவில் அவற்றை பெரிய அளவில் செயல்படுத்துவதன் சாத்தியக்கூறுகள் குறித்த கேள்விகளை எழுப்பியுள்ள நிலையில், அணுசக்தி கூட்டணிகளுக்கான இந்தியாவின் சர்வதேச அணுகுமுறையில் எஸ்.எம்.ஆர்-கள் முக்கியப் புள்ளியாக மாறி வருகின்றன.
கடந்த மாதம் இந்தியாவிற்கு வருகை தந்த அமெரிக்காவின் உயர் மட்ட அணுசக்தி தூதுக்குழுவினருடன், நாட்டின் உயர்மட்ட அரசு அதிகாரிகள் நடத்திய சந்திப்புகளில், சிறிய அணு உலைகளின் (எஸ்.எம்.ஆர்-கள்) உற்பத்தி மதிப்புச் சங்கிலியில் இந்தியா படிப்படியாக நுழைய விரும்புவது குறித்துத் தெரிவிக்கப்பட்டது. உள்நாட்டு எஸ்.எம்.ஆர் சுற்றுச்சூழல் அமைப்பின் வளர்ச்சியை ஆதரிப்பதற்காக, இந்தியா தீவிரமாக வெளிநாட்டு நிபுணத்துவம் மற்றும் முதலீடுகளை நாடி வருகிறது என்பது இதன் மூலம் தெரியவந்துள்ளது.