தமிழ்நாட்டில் முறையான அனுமதியின்றி 2,000-க்கும் மேற்பட்ட சட்டவிரோதக் கல்குவாரிகள் இயங்கி வந்தது கண்டறியப்பட்டதைத் தொடர்ந்து, இந்த முறைகேட்டிற்குத் துணையாக இருந்ததாகக் கனிமவளத்துறையைச் சேர்ந்த 27 மாவட்ட அதிகாரிகள் கூண்டோடு பணியிட மாற்றம் செய்யப்பட்டுள்ளனர்.தமிழ்நாடு முழுவதும் உரிமம் பெற்றுச் செயல்படும் குவாரிகளின் எண்ணிக்கையை விட, சட்டவிரோதமாக இயங்கும் குவாரிகளின் எண்ணிக்கை அதிகமாக இருப்பது வெளிச்சத்திற்கு வந்துள்ளது. கனிமவளத்துறைப் பதிவுகளின்படி, தமிழகம் முழுவதும் முறைப்படி உரிமம் பெற்றுச் செயல்படும் கருங்கல் மற்றும் கல்குவாரிகளின் எண்ணிக்கை 1,845 ஆகும். எனினும், அதிகாரப்பூர்வ எண்ணிக்கையைத் தாண்டி 2,000-க்கும் அதிகமான குவாரிகள் முறையான எவ்வித அனுமதியுமின்றிச் சட்டவிரோதமாகச் செயல்பட்டு வருவதாகக் கடுமையான குற்றச்சாட்டுகள் எழுந்தன.
இது தொடர்பாகப் புவியியல் மற்றும் சுரங்கத்துறை அமைச்சர் பிரபு உத்தரவின் பேரில் மாநிலம் முழுவதும் ரகசிய மற்றும் தீவிரக் கள ஆய்வுகள் மேற்கொள்ளப்பட்டன. இந்த ஆய்வின் முடிவில், கனிமவளத்துறை அதிகாரிகளுக்குத் தெரிந்தே இந்த மாபெரும் முறைகேடுகள் பல ஆண்டுகளாக நடந்து வந்தது ஆதாரங்களுடன் கண்டறியப்பட்டது. குவாரி முறைகேடுகளில் அதிகாரிகளின் நேரடித் தொடர்பு மற்றும் லஞ்ச விவகாரங்கள் உறுதி செய்யப்பட்டதைத் தொடர்ந்து, துறை ரீதியான நடவடிக்கைகள் முடுக்கிவிடப்பட்டுள்ளன.
இந்த விவகாரத்தில் நேரடியாகச் சம்பந்தப்பட்ட மற்றும் முறைகேடுகளைக் கண்டுகொள்ளாமல் இருந்த 27 மாவட்டங்களைச் சேர்ந்த கனிமவளத்துறை மற்றும் புவியியல் துறை அதிகாரிகள் அனைவரும் உடனடியாகக் கூண்டோடு பணியிட மாற்றம் செய்யப்பட்டு உத்தரவு பிறப்பிக்கப்பட்டுள்ளது. மேலும், இவர்களில் முக்கியப் புள்ளிகள் மீது துறை ரீதியான ஒழுங்கு நடவடிக்கைகளும் பாயவுள்ளன. முறையான அனுமதியின்றி இயங்கி வந்த 2,000-க்கும் மேற்பட்ட சட்டவிரோதக் குவாரிகளையும், அங்குள்ள கனரக எந்திரங்களையும் உடனடியாகப் பறிமுதல் செய்து சீல் வைக்க மாவட்ட ஆட்சியர்களுக்கு அரசு உத்தரவிட்டுள்ளது. இதனைத் தொடர்ந்து, அந்தந்த மாவட்ட வருவாய்த் துறை அதிகாரிகள் மற்றும் சட்டம்-ஒழுங்கு போலீசார் இணைந்து சட்டவிரோதக் குவாரிகளுக்குச் சீல் வைக்கும் பணிகளைத் தீவிரமாகத் தொடங்கியுள்ளனர்.
குவாரி மாஃபியாக்கள் மற்றும் முறைகேடான விநியோகஸ்தர்களால் எவ்விதச் சட்டம்-ஒழுங்குச் சலசலப்புகளோ அல்லது அதிகாரிகளுக்கு அச்சுறுத்தலோ ஏற்படாமல் தடுக்க, குவாரி பகுதிகள் முழுவதும் ஆயுதம் ஏந்திய போலீசார் குவிக்கப்பட்டுத் தீவிரப் பாதுகாப்பு வளையம் ஏற்படுத்தப்பட்டுள்ளது. கனிம வளங்கள் கடத்தப்படுவதைத் தடுக்க முக்கியச் சாலைகளில் போக்குவரத்துப் பிரிவு போலீசார் மற்றும் சட்டம்-ஒழுங்கு போலீசார் இணைந்து லாரிகளைத் தீவிரமாகச் சோதனையிட்டு வருகின்றனர்.