இந்தியா மற்றும் நேபாளத்தில் பெய்து வரும் கனமழையால் பல்வேறு பகுதிகளில் வெள்ளப்பெருக்கு மற்றும் நிலச்சரிவுகள் ஏற்பட்டுள்ளன.
இந்தியாவின் உத்தரப் பிரதேசத்தில் 56 பேரும், நேபாளத்தில் 14 பேரும் உயிரிழந்துள்ளனர். நேபாளத்தில் மேலும் 11 பேர் மாயமாகியுள்ளதாக தகவல் வெளியாகியுள்ளது.
இந்தியாவின் உத்தரப் பிரதேசத்தில் கடந்த வெள்ளிக்கிழமை முதல் ஞாயிற்றுக்கிழமை காலை வரை 66.5 மி.மீ. மழை பதிவாகியுள்ளது. இதே காலகட்டத்தில் இயல்பான மழை அளவு 7.6 மி.மீ. மட்டுமே என மாநில பேரிடர் நிவாரண ஆணையர் தெரிவித்துள்ளார். கனமழையால் ஏற்பட்ட வெள்ளப்பெருக்கில் 56 பேர் உயிரிழந்துள்ளனர். மேலும் 46 பேர் காயமடைந்ததுடன், 1,000-க்கும் மேற்பட்ட வீடுகள் சேதமடைந்துள்ளன. வெள்ளம் சூழ்ந்த பகுதிகளில் மீட்பு மற்றும் நிவாரணப் பணிகள் தொடர்ந்து நடைபெற்று வருகின்றன.
நேபாளத்தில் கடந்த வியாழக்கிழமை முதல் பெய்து வரும் தொடர் கனமழையால் பல்வேறு பகுதிகளில் வெள்ளப்பெருக்கு மற்றும் நிலச்சரிவுகள் ஏற்பட்டுள்ளன. இதுவரை 14 பேர் உயிரிழந்துள்ள நிலையில், 11 பேர் மாயமாகியுள்ளதாக அதிகாரிகள் தெரிவித்துள்ளனர்.
மத்திய நேபாளத்தில் உள்ள நாராயணி ஆற்றின் நீர்மட்டம் 9 மீட்டர் என்ற எச்சரிக்கை அளவைத் தாண்டியதை தொடர்ந்து, ஆற்றின் கரையோரப் பகுதிகளில் வசிக்கும் மக்களுக்கு அதிகாரிகள் எச்சரிக்கை விடுத்துள்ளனர்.
நேபாளத்தில் உள்ள 77 மாவட்டங்களில் 49 மாவட்டங்களுக்கு திடீர் வெள்ள அபாய எச்சரிக்கை விடுக்கப்பட்டுள்ளது.
இந்தியாவில் கங்கை, கந்தக், கோசி, பாக்மதி மற்றும் நர்மதா உள்ளிட்ட முக்கிய ஆறுகளில் சில இடங்களில் நீர்மட்டம் அபாய அளவைத் தாண்டியுள்ளது. மத்திய நீர் ஆணையத்தின் கண்காணிப்பில் உள்ள பல நிலையங்களில் நிலைமை தீவிரமாக இருப்பதாக தெரிவிக்கப்பட்டுள்ளது.
வெள்ளம் சூழ்ந்த பகுதிகளில் மீட்புப் படையினர் மற்றும் அதிகாரிகள் தொடர்ந்து பணியாற்றி வருகின்றனர். பாதிக்கப்பட்ட மக்களுக்கு நிவாரணப் பொருட்கள் வழங்கப்படுவதுடன், பயிர் சேதங்களை மதிப்பிட்டு உரிய இழப்பீடு வழங்கவும் அதிகாரிகளுக்கு அறிவுறுத்தப்பட்டுள்ளது.
கனமழை தொடர்ந்து பெய்து வருவதால் நேபாளத்தில் மேலும் திடீர் வெள்ளப்பெருக்கு ஏற்படக்கூடும் என அதிகாரிகள் எச்சரித்துள்ளனர். முக்கிய ஆறுகள் மற்றும் அவற்றின் கிளை ஆறுகளில் நீர்மட்டம் தொடர்ந்து உயர்ந்து வருவதால் கரையோர மக்கள் எச்சரிக்கையாக இருக்க அறிவுறுத்தப்பட்டுள்ளனர்.