போலி போக்சோ வழக்குபதிவு! ஆய்வாளர், காவலர் பணியிடை நீக்கம்!

சென்னை திருமங்கலம் வி.ஆர். மாலில் பதிவு செய்யப்பட்ட போக்சோ வழக்கு போலியாக ஜோடிக்கப்பட்டதாகக் கூறப்படும் குற்றச்சாட்டு பெரும் பரபரப்பை ஏற்படுத்தியுள்ளது.

மேட்ரிமோனியல் இணையதளத்தில் தனக்கு 25 வயது எனக் குறிப்பிட்டு, சென்னையைச் சேர்ந்த பெண் ஒருவரைத் திருமண மோசடியில் சிக்க வைக்க சுரேஷ் கண்ணா முயன்றதாகக் கூறப்படுகிறது. ஆனால், அந்தப் பெண் அவரது முயற்சியைப் புரிந்துகொண்டு விலகியதாகத் தெரிகிறது.இதனால் ஆத்திரமடைந்த சுரேஷ் கண்ணா, அந்தப் பெண்ணைப் பழிவாங்கும் நோக்கில் அவரது தம்பி ஸ்ரீராமை போக்சோ வழக்கில் சிக்க வைக்கத் திட்டமிட்டதாக வாக்குமூலத்தில் தெரிவித்துள்ளதாகக் கூறப்படுகிறது.இதற்காக இடைத்தரகர்கள் மூலம் மாதவரம் பகுதியில் மதுபோதையில் சாலையில் தகராறில் ஈடுபட்டதாகக் கூறப்படும் 17 வயது பெண்ணின் தொடர்பைப் பெற்றதாகத் தகவல் வெளியாகியுள்ளது. அந்தப் பெண்ணை வைத்து ஸ்ரீராமை சென்னை திருமங்கலத்தில் உள்ள வி.ஆர். மாலுக்கு வரவழைத்து, அவர் மீது போக்சோ வழக்குப் பதிவு செய்யத் திட்டமிட்டதாகக் கூறப்படுகிறது.அதன்படி, கடந்த 23.08.2026 அன்று வி.ஆர். மாலில் சந்திப்பு நடைபெற்றதாகவும், அதன் பின்னர் புகார் அளிக்கப்பட்டதாகவும் சுரேஷ் கண்ணாவின் வாக்குமூலத்தில் குறிப்பிடப்பட்டுள்ளதாகத் தகவல் வெளியாகியுள்ளது.

ஸ்ரீராமைக் கைது செய்யத் திட்டமிட்ட நேரத்தில், சம்பந்தப்பட்ட பெண் மதுபோதையில் சாலையில் தகராறில் ஈடுபட்ட வீடியோ வெளியானதாகக் கூறப்படுகிறது. இதையடுத்து கைது நடவடிக்கை கைவிடப்பட்டதாகவும், தன்னிடம் பணம் பெற்றுக்கொண்டதால் கைது செய்யப்படவில்லை என சுரேஷ் கண்ணா வாக்குமூலத்தில் தெரிவித்துள்ளதாகவும் கூறப்படுகிறது.மேலும், ஸ்ரீராமை போக்சோ வழக்கில் சிக்க வைப்பதற்காக ரூ.5 லட்சம் கொடுக்கப்பட்டதாகவும் அந்த வாக்குமூலத்தில் கூறப்பட்டுள்ளதாகத் தகவல் வெளியாகியுள்ளது.

இந்தக் குற்றச்சாட்டுகளின் அடிப்படையில், பணம் பெற்றுக்கொண்டு போக்சோ வழக்கைப் பதிவு செய்ததாகக் கூறப்படும் புகாரில், திருமங்கலம் அனைத்து மகளிர் காவல் நிலையத்தின் முன்னாள் ஆய்வாளர் விஜயலட்சுமி மற்றும் காவலர் வசந்தராஜா ஆகியோர் பணியிடை நீக்கம் செய்யப்பட்டுள்ளனர்.இந்த விவகாரம் தொடர்பாக உயர் காவல்துறை அதிகாரிகள் விசாரணை நடத்தி வருகின்றனர். சுரேஷ் கண்ணா அளித்ததாகக் கூறப்படும் வாக்குமூலத்தில் இடம்பெற்றுள்ள தகவல்கள் மற்றும் காவல்துறையினர் மீதான குற்றச்சாட்டுகள் விசாரணையின் மூலம் உறுதி செய்யப்பட வேண்டியுள்ளது.