மத்திய அரசு சுகாதார மற்றும் ஆயுள் காப்பீட்டு பிரீமியங்களில் விதிக்கப்பட்டுள்ள 18% ஜிஎஸ்டியை நீக்க முன்மொழிந்துள்ளது.
இதனால் காப்பீட்டுத் திட்டங்கள் மலிவாகி, மக்கள் எளிதில் காப்பீட்டைப் பெற முடியும்.
மத்திய அரசு சுகாதார மற்றும் ஆயுள் காப்பீட்டு பிரீமியங்களில் விதிக்கப்பட்டுள்ள 18% ஜிஎஸ்டியை முழுமையாக நீக்க முன்மொழிவை கொண்டு வந்துள்ளது. தற்போது 18% வரி காரணமாக, ₹10,000 பிரீமியத்திற்கு கூடுதலாக ₹1,800 வரை செலுத்த வேண்டிய நிலை உள்ளது. இந்த சுமை நீங்கும்போது, பொதுமக்கள் காப்பீட்டை எளிதில் அணுகக்கூடிய நிலை உருவாகும். இதனால் காப்பீட்டு பாதுகாப்பு, குறிப்பாக நடுத்தர மற்றும் ஏழை குடும்பங்களுக்கும் விரிவடையும்.இன்றைய சூழலில், ஒரு சாதாரண சிகிச்சைக்கும் 20,000 ரூபாய் முதல் 50,000 ரூபாய் வரை செலவு ஆகிறது. பெரிய நோய்களுக்கு பல லட்சம் செலவாகிறது. இதனால், காப்பீடு இல்லாமல் மக்கள் தங்கள் சேமிப்பையும், கடனையும் பயன்படுத்தும் நிலை ஏற்படுகிறது. ஜிஎஸ்டி பூஜ்ஜியம் செய்தால், காப்பீட்டு திட்டங்கள் மலிவாகி, மருத்துவ செலவுகளை அரசு அங்கீகரித்த காப்பீட்டு திட்டங்களின் மூலமாக மக்கள் எளிதில் சமாளிக்க முடியும். இது மருத்துவ அவசரங்களில் “அரசியல்முறை பாதுகாப்பு வலை” போன்று செயல்படும்.
ஜிஎஸ்டி நீக்கம் காரணமாக காப்பீடு மலிவு விலையில் கிடைப்பதால், காப்பீடு பெறும் குடும்பங்களின் எண்ணிக்கை பெரிதும் அதிகரிக்கும் என்று நிபுணர்கள் கூறுகின்றனர். மக்கள் சேமிப்பு மனப்பாங்குடன் வாழ்வார்கள்; மருத்துவ செலவுக்காக கடன் வாங்கும் நிலை குறையும். மேலும், சுகாதார காப்பீடு அதிகரிப்பதால் அரசாங்க மருத்துவமனைகளின் சுமையும் குறைந்து, தனியார் மருத்துவமனைகளில் சிகிச்சை எடுப்பதற்கும் ஏழை மக்கள் வாய்ப்பு பெறுவார்கள்.
இதைப் பற்றி சில மாநிலங்கள் “ஜிஎஸ்டி குறைத்தால் வருவாய் இழப்பு ஏற்படும்” என்று கவலை தெரிவித்துள்ளன. தற்போது வருடாந்திரம் 50,000 கோடி ரூபாய் வரை வருவாய் இழப்பு ஏற்படும் என கணிக்கப்பட்டுள்ளது. எனினும் மத்திய அரசு, வருவாய் இழப்பு குறுகிய காலத்திற்கே என்று விளக்கி, “ஜிஎஸ்டி குறைவால் நுகர்வு அதிகரித்து, நீண்ட காலத்தில் வரி வசூல் தானாக அதிகரிக்கும்” என்ற நம்பிக்கையையும் தெரிவித்துள்ளது. மேலும், மத்திய அரசின் பகிர்ந்தளிக்கக்கூடிய வருவாயில் 41% மாநிலங்களுக்கு வழங்கப்படும் என்பதால், மாநில நலத்திட்டங்களுக்கும் பாதிப்பு ஏற்படாது என உறுதி அளிக்கப்பட்டுள்ளது.
இந்த திட்டம் செயல்பட்டால், ஏழை மற்றும் நடுத்தர மக்கள் சுகாதார காப்பீட்டின் மூலம் நிதி பாதுகாப்பைப் பெறுவார்கள். குடும்பத்தின் நிதிசுமை குறையும். குறிப்பாக கிராமப்புறங்களில் அதிகரிக்கும் மருத்துவ செலவுகளுக்கு எதிரான பெரிய பாதுகாப்பு வலையாக இது அமையும். மருத்துவ அவசர நிலைகளில் “வீடு விற்கும் நிலை” குறைந்து, “காப்பீடு காப்பாற்றும் நிலை” உருவாகும்.
ஜிஎஸ்டி விலக்கு நடைமுறைக்கு வந்தால், காப்பீட்டு பாதுகாப்பு “செல்வந்தர்களின் உரிமை” என்ற நிலையை விட்டு, “எல்லோருக்கும் கிடைக்கும் அடிப்படை உரிமை” என மாறும். சுகாதார மற்றும் ஆயுள் காப்பீடு மலிவாகி, அடித்தட்டு மக்களுக்கு உண்மையான நிவாரணமாக அமையும். “மலிவு + பாதுகாப்பு” என்ற இரட்டை நன்மையை மக்களுக்கு தரும் இந்த முன்மொழிவு, சமூக நலனில் ஒரு பெரிய மைல் கல்லாக இருக்கும். வரியை விதித்து பின்பு நீக்கி விளையாடும் மோடி தலைமையிலான மத்திய அரசை கட்டுப்படுத்த முடியாமல் எதிர்க்கட்சிகள் திகைத்து நிற்கின்றன. ஆனால் இது அடித்தட்டு மக்களுக்கு ஜாலியான அதாவது சந்தோஷமான செய்தி என நிபுணர்கள் கூறுகின்றனர்.