தமிழகத்தில் நடப்பாண்டில் இதுவரை டெங்கு காய்ச்சல் பாதிப்பு காரணமாக 9 பேர் உயிரிழந்துள்ளதாக மாநில மக்கள் நல்வாழ்வு மற்றும் சுகாதாரத் துறை அமைச்சர் அருண்ராஜ் வெள்ளிக்கிழமை (18.09.2026) தெரிவித்துள்ளார்.இருப்பினும், மாநிலத்தின் சுகாதாரச் சூழல் முற்றிலும் கட்டுப்பாட்டுக்குள் தான் உள்ளது என்றும், பொதுமக்கள் அச்சப்படத் தேவையில்லை என்றும் அவர் உறுதியளித்துள்ளார்.
மாநிலத்தில் டெங்கு பாதிப்பு குறித்த புள்ளிவிவரங்களைப் பகிர்ந்த அமைச்சர், செப்டம்பர் 14-ல் 61-ஆக இருந்த தினசரி பாதிப்பு, செப்டம்பர் 15-ல் 133-ஆகவும், வெள்ளிக்கிழமை (18.09.2026) 283-ஆகவும் அதிகரித்தது என்றார். பின்னர் செப்டம்பர் 17-ல் இது 244-ஆகக் குறைந்துள்ளது. பருவநிலை மாற்றமே இந்தத் திடீர் ஏற்ற இறக்கத்திற்குக் காரணம் எனக் குறிப்பிட்ட அவர், இதுதொடர்பாகச் சுகாதாரத் துறை அனைத்து முன்னெச்சரிக்கை நடவடிக்கைகளையும் போர்க்கால அடிப்படையில் மேற்கொண்டு வருவதாகக் கூறினார்.
டெங்கு பரவலைத் தடுக்க முதலமைச்சர் சி. ஜோசப் விஜய் ஆய்வுக் கூட்டம் நடத்தி, அமைச்சர்களுக்கும் அரசு அதிகாரிகளுக்கும் உரிய வழிகாட்டுதல்களை வழங்கியுள்ளார். மாநிலம் முழுவதும் வீடுகள் தோறும் சென்று தேங்கி நிற்கும் நன்னீரை அகற்றும் பணியில் கொசு ஒழிப்புப் பணியாளர்கள் தீவிரமாக ஈடுபட்டு வருகின்றனர்.
தொழிற்பேட்டைகள் மற்றும் கட்டுமான நிறுவனங்கள் தங்களது வளாகங்களில் தண்ணீர் தேங்க அனுமதிக்கக் கூடாது என்றும், விதியை மீறினால் கடுமையான அபராதம் விதிக்கப்படும் என்றும் எச்சரிக்கப்பட்டுள்ளது.டெங்கு சிகிச்சைகளுக்காகத் தனிப் நெறிமுறைகள் தயார் செய்யப்பட்டு, அரசு மருத்துவமனை மருத்துவர்களுக்குச் சிறப்புப் பயிற்சிகளும் வழங்கப்பட்டுள்ளன.
எழும்பூரில் உள்ள மண்டலக் கண் மருத்துவமனை மற்றும் அரசு கண் மருத்துவமனையில் நடைபெற்ற ‘விழித்திரை காப்போம்’ என்ற மாநில அளவிலான புதிய முன்னோடித் திட்டத்தைத் தொடங்கி வைத்துப் பேசிய போதே அமைச்சர் இத்தகவல்களைத் தெரிவித்தார்.30 வயதிற்கு மேற்பட்டவர்கள், நீரிழிவு (Diabetes) மற்றும் ரத்த அழுத்தப் பிரச்னை உள்ளவர்களுக்கு ஆண்டுக்கு ஒருமுறை விழித்திரைக் கோளாறுகளைக் கண்டறிந்து தொடக்கத்திலேயே சிகிச்சையளிப்பதே இத்திட்டத்தின் முக்கிய நோக்கமாகும்.
இத்திட்டம் 385 வட்டார அளவிலான ஆரம்ப சுகாதார நிலையங்கள், 37 மாவட்ட தலைமை மருத்துவமனைகள் மற்றும் 150 நகர்ப்புற ஆரம்ப சுகாதார நிலையங்கள் உள்ளிட்ட இடங்களில் செயல்படவுள்ளது.நீரிழிவு நோயாளிகளுக்கு ஃபண்டஸ் (Fundus) விழித்திரைப் பரிசோதனையைக் கட்டாயமாக்குவதற்கு முன்பாக, பொதுமக்களின் கருத்துக்கள் கேட்கப்படும் என்றும் அமைச்சர் கூறினார்.தொடர்ந்து மருத்துவக் கல்வி குறித்துப் பேசிய அமைச்சர், திருநெல்வேலி, திருச்சி, தர்மபுரி, வேலூர், திருவண்ணாமலை மற்றும் நாமக்கல் ஆகிய 6 மாவட்டங்களில் ரூ.270.26 கோடி மதிப்பில் புதிய செவிலியர் கல்லூரிகள் தொடங்கப்படும் என்றும், செவிலியர், மருந்தாளுநர் மற்றும் 12 சார்ந்த மருத்துவப் படிப்புகளுக்கான கூடுதல் இடங்கள் உருவாக்கப்பட்டுள்ளதாகவும் தெரிவித்தார்.