முன்னாள் நகராட்சி நிர்வாகத்துறை அமைச்சர் கே.என்.நேருவுக்குத் தொடர்புடைய இடங்களில் அமலாக்கத்துறை மற்றும் லஞ்ச ஒழிப்புத்துறையினர் நடத்திய அதிரடிச் சோதனை, தமிழக அரசியல் மற்றும் சின்னத்திரை வட்டாரத்தில் பெரும் சர்ச்சையையும் பரபரப்பையும் ஏற்படுத்தியுள்ளது.
இந்த ஊழல் வழக்கின் விசாரணையின் போது, லஞ்சமாகப் பெறப்பட்ட கமிஷன் பணம் சென்னை மற்றும் பல்வேறு நிறுவனங்களில் முதலீடு செய்யப்பட்டுள்ளதும், வெளிநாடுகளுக்குக் கடத்தப்பட்டுள்ளதும் அதிகாரிகளால் கண்டறியப்பட்டது. அத்துடன் துணிக்கடைகள், ஹோட்டல்கள் மற்றும் வணிக நிறுவனங்களுக்கு வட்டிக்குப் பணம் கொடுத்து வருமானம் ஈட்டப்பட்டதாகவும் குற்றச்சாட்டுகள் எழுந்துள்ளன. இந்த நிதிப் பரிமாற்ற வலைப்பின்னலை ஆய்வு செய்த போதுதான், சில பிரபல சின்னத்திரை நடிகைகளின் பெயர்கள் இந்த விவகாரத்திற்குள் இழுக்கப்பட்டு அதிர்ச்சியை ஏற்படுத்தியுள்ளது.
குறிப்பாக, பிரபல சின்னத்திரை நடிகை ஜனனி அசோக் குமார் உள்ளிட்ட சில நடிகைகளின் வங்கிக் கணக்குகளுக்கு, கே.என். நேருவின் சகோதரர் ரவிச்சந்திரன் மூலமாகப் பணம் மாற்றப்பட்டதாகத் தகவல்கள் பரவின. கமிஷன் அடிப்படையில் பெறப்பட்ட அந்தத் தொகைகள், பின்னர் வேறு சில கணக்குகளுக்குத் திசைதிருப்பப்பட்டதாகக் கூறப்படும் குற்றச்சாட்டின் பேரில் அமலாக்கத்துறை இவர்களைத் தனது விசாரணை வளையத்திற்குள் கொண்டு வரத் திட்டமிட்டுள்ளதாகத் தெரிகிறது. இந்தத் தகவல் சமூக வலைதளங்களில் காட்டுத்தீயாகப் பரவி விவாதப் பொருளாக மாறியுள்ளது.
தன் மீதான இந்த அதிரடிக் குற்றச்சாட்டுகளுக்கு மறுப்பு தெரிவித்து நடிகை ஜனனி அசோக் குமார் நீண்ட விளக்கம் அளித்துள்ளார். இந்த ரூ. 634 கோடி ஊழல் வழக்கிற்கும் தனக்கும் எந்தச் சம்பந்தமும் இல்லை என்றும், தான் எந்தவொரு அரசியல்வாதியுடனும் தொடர்பில் இல்லை என்றும் அவர் திட்டவட்டமாகக் கூறியுள்ளார். தான் நடித்த ‘காசாகிராண்ட்’ விளம்பரத்தில் நூற்றுக்கணக்கான கலைஞர்கள் நடித்திருந்தும், தனது நற்பெயரைக் கெடுக்கவே சிலர் தன்னை மட்டும் குறிவைப்பதாக வேதனை தெரிவித்துள்ள அவர், படப்பிடிப்பு முடிந்து சென்னை திரும்பியதும் அவதூறு பரப்புபவர்கள் மீது சட்டப்படி காவல் துறையில் புகார் அளிக்கப் போவதாகவும் எச்சரித்துள்ளார்.