தமிழ் மொழியின் கலைச் செழுமையையும் பண்பாட்டுப் பெருமையையும் பாதுகாத்து வளர்க்கும் நோக்கில், தமிழ்நாடு அரசின் தமிழ் வளர்ச்சித் துறையின் நேரடிக் கட்டுப்பாட்டின் கீழ் இயல் இசை நாடக மன்றம் செயல்பட்டு வருகிறது.
தற்போது தமிழகத்தில் புதிய ஆட்சி அமைந்துள்ள நிலையில், இந்த மன்றத்தின் புதிய தலைவராக பிரபல நாட்டுப்புறப் பாடகர் புஷ்பவனம் குப்புசாமி நியமிக்கப்பட்டுள்ளார். கலை உலகில் தனக்கெனத் தனிமுத்திரை பதித்த அவருக்கு, திரை உலகினரும் ரசிகர்களும் தங்களது மனமார்ந்த வாழ்த்துகளையும் பாராட்டுகளையும் தெரிவித்து வருகின்றனர்.
நாகப்பட்டினம் மாவட்டம் வேதாரண்யம் அருகே உள்ள ‘புஷ்பவனம்’ என்ற கடலோரக் கிராமத்தில் பிறந்து வளர்ந்த குப்புசாமி, தனது இயல்பான குரலாலும் கிராமிய இசைப் பங்களிப்பாலும் கலை உலகில் உயர்ந்த நிலையை அடைந்தார். இசைத் துறையில் எம்.ஏ., எம்.பில். பட்டங்களைப் பெற்றதோடு, கிராமப்புறப் பாடல்கள் குறித்த ஆய்வில் முனைவர் (Ph.D.) பட்டமும் வென்றுள்ளார். இசை உலகிலும் கல்விக் கூடங்களிலும் தனக்கென தனித்துவமான தடம் பதித்துள்ள இவர், தொலைக்காட்சி நிகழ்ச்சிகளில் நடுவராகவும் பங்கேற்று கலைத் திறமைகளை ஊக்கப்படுத்தி வருகிறார்.
திரைப்பட உலகில் இளையராஜா, வித்யாசாகர், பரணி, தேவி ஸ்ரீ பிரசாத், யுவன் சங்கர் ராஜா, இமான், ஜி.வி. பிரகாஷ், அனிருத் போன்ற முன்னணி இசையமைப்பாளர்களின் இசையில் நூற்றுக்கணக்கான சூப்பர் ஹிட் பாடல்களைப் பாடியுள்ளார். ‘ஆளான நாள் முதலா’, ‘தொட்டுத் தொட்டுப் பேசும் சுல்தானா’, ‘குருவி கொடஞ்ச கொய்யாப்பழம்’, ‘அப்பன் பண்ண’, ‘ஜிங் சிக்கா’ உள்ளிட்ட எண்ணற்ற திரைப்படப் பாடல்களும், பல பக்திப் பாடல்களும் இன்றும் ரசிகர்களின் மனதில் நீங்காத இடம் பிடித்துள்ளன. மேலும் ‘சொல்ல மறந்த கதை’, ‘வேல்முருகன் போர்வெல்ஸ்’ ஆகிய படங்களில் நடிகராகவும் தனது திறமையை வெளிப்படுத்தியுள்ளார்.
தனது மனைவி அனிதா குப்புசாமியுடன் இணைந்து இந்தியா மட்டுமன்றி உலக நாடுகளில் சுமார் 3,000-க்கும் மேற்பட்ட கலை நிகழ்ச்சிகளை நடத்தித் தமிழ் நாட்டுப்புற இசையின் பெருமையை உலகரங்கிற்கு கொண்டு சென்றுள்ளார். மண்ணின் மணமும் கலை அனுபவமும் கல்விப் பின்னணியும் கொண்ட புஷ்பவனம் குப்புசாமி இயல் இசை நாடக மன்றத் தலைவராகப் பொறுப்பேற்றிருப்பது, தமிழகக் கலைத்துறைக்கும் நாட்டுப்புறக் கலைஞர்களுக்கும் புதிய புத்துணர்ச்சியையும் நல்வழிகாட்டுதலையும் வழங்கும் என்று எதிர்பார்க்கப்படுகிறது.