ஈரான் மற்றும் அமெரிக்கா இடையிலான பதற்றம் மீண்டும் அதிகரித்துள்ளது. அமெரிக்கா தரப்பிலிருந்து ஏதேனும் ராணுவத் தாக்குதல் நடத்தப்பட்டால், அதற்கு உடனடியாகவும் வலுவாகவும் பதிலடி கொடுக்க வேண்டும் என்று ஈரானின் உச்ச தலைவர் முஜ்தபா கமேனி, அந்நாட்டு மூத்த ராணுவத் தளபதிகளுக்கு உத்தரவிட்டுள்ளதாகத் தகவல் வெளியாகியுள்ளது.
எந்தப் புவியியல் எல்லைக்கும் கட்டுப்படாமல் எதிரியின் அச்சுறுத்தல்களை எதிர்கொள்ள வேண்டும் என்றும் அவர் வலியுறுத்தியுள்ளார்.
சமூக வலைதளத்தில் வெளியிட்ட பதிவுகளில், அனைத்து வகையான அச்சுறுத்தல்களுக்கும் உடனடியாகவும் திறம்படவும் பதிலளிக்க வேண்டும் என்று முஜ்தபா கமேனி குறிப்பிட்டுள்ளார். மீண்டும் ராணுவ அல்லது பயங்கரவாதத் தாக்குதல்கள் நடத்தப்பட்டால், அதற்கு எப்போது, எந்த நிபந்தனைகளின் அடிப்படையில் பதிலடி கொடுப்பது என்பதை ஈரானின் ராணுவமும் மக்களுமே தீர்மானிப்பார்கள் என்றும் தெரிவித்துள்ளார். மேலும், எதிரிகளின் தாக்குதல்களைத் தடுக்கும் வகையில் ராணுவம் தொடர்ந்து போருக்குத் தயாராக இருக்க வேண்டும் என்றும், நாட்டின் பாதுகாப்புத் தொழில்நுட்பங்களை வலுப்படுத்த வேண்டும் என்றும் அறிவுறுத்தியுள்ளார்.இதற்கிடையில், ஈரானுடனான போரை முடிவுக்குக் கொண்டுவர அமெரிக்கா அவசரப்படவில்லை என்று அந்நாட்டு அதிபர் டொனால்டு டிரம்ப் தெரிவித்துள்ளார். இரு நாடுகளுக்கும் இடையே பேச்சுவார்த்தைகள் தொடர்ந்து நடைபெற்று வருவதாகவும், ஈரான் பேச்சுவார்த்தையில் ஈடுபட விரும்புவதாகவும் அவர் கூறியுள்ளார். பல மாதங்களாக நீடிக்கும் மோதலுக்கு இதுவரை நிரந்தரத் தீர்வு எட்டப்படாத நிலையில், காலம் அமெரிக்காவுக்குச் சாதகமாக இருப்பதாகவும் டிரம்ப் குறிப்பிட்டுள்ளார்.
இந்தச் சூழலில், இரு நாடுகளுக்கும் இடையிலான பேச்சுவார்த்தையை முன்னெடுத்துச் செல்ல புதிய வரைவு ஒப்பந்தம் தயாரிக்கப்பட்டுள்ளதாகத் தகவல் வெளியாகியுள்ளது. அதில், ஈரானிடம் உள்ள அதிக செறிவூட்டப்பட்ட யுரேனியத்தை மூன்றாவது நாட்டிடம் ஒப்படைப்பது அல்லது அதன் செறிவூட்டல் அளவைக் குறைப்பது உள்ளிட்ட அம்சங்கள் இடம்பெற்றுள்ளதாகக் கூறப்படுகிறது. மேலும், ஆரம்பகட்ட உடன்பாடு எட்டப்பட்ட ஏழு நாட்களுக்குள் சர்வதேசக் கப்பல் போக்குவரத்துக்கு முக்கியமான ஹார்முஸ் நீரிணையை மீண்டும் திறக்க வேண்டும் என்ற நிபந்தனையும் முன்வைக்கப்பட்டுள்ளதாகத் தெரிவிக்கப்படுகிறது. இந்த முன்மொழிவுகள் இறுதி ஒப்பந்தமாக ஏற்கப்பட்டதாக இதுவரை உறுதி செய்யப்படவில்லை.