இவ்வளவு பெரிய டைனோசரா?- தென்கிழக்கு ஆசியாவில் விஞ்ஞானிகள் கண்டுபிடித்த அதிசயம்

இதன் பிரம்மாண்டத்தை விவரிக்க விஞ்ஞானிகள் கொடுக்கும் அளவீடுகள் மலைக்க வைக்கின்றன. எடை சுமார் 27 டன்கள். அதாவது, 9 முழு ஆசிய யானைகளை ஒன்றாகச் சேர்த்தால் எவ்வளவு எடை இருக்குமோ, அவ்வளவு. நீளம் தலை முதல் வால் வரை சுமார் 27 மீட்டர்கள். இது ஒரு பிரம்மாண்ட நீலத் திமிங்கலத்தின் நீளத்திற்கு இணையானது. ஒரு கூடைப்பந்து மைதானத்தின் நீளத்திற்குச் சமம். இது நீண்ட கழுத்து மற்றும் நீண்ட வால் கொண்ட, ‘சாரோபாட்’ என்ற தாவர உண்ணி டைனோசர் வகையைச் சேர்ந்தது. லண்டனின் இயற்கை வரலாற்று அருங்காட்சியகத்தில் உள்ள புகழ்பெற்ற ‘டிப்பி’  என்ற டைனோசரை விட, இந்த நாகாடைட்டன் 10 டன்கள் கூடுதல் எடை கொண்டது என்கிறார் இந்த ஆய்வின் முதன்மை ஆசிரியர் திதிவூட் செதபானிச்சகுல். ஆனால், உலகிலேயே மிகப்பெரிய டைனோசர்களான பட்டகோடைன் (60 டன்கள்) போன்றவற்றுடன் ஒப்பிடும்போது, இது சிறியதுதான் என்றும் அவர் குறிப்பிடுகிறார்.