மும்பை: உலக ஆடியோ, வீடியோ பொழுதுபோக்கு துறை உச்சி மாநாடு(வேவ்ஸ்) மும்பையில் கடந்த 1ம் தேதி துவங்கி நேற்று வரை நடந்தது, இதில், இந்தியாவின் ஊடகம் மற்றும் பொழுதுபோக்கு துறை குறித்த ஐந்து அறிக்கைகளை ஒன்றிய தகவல் ஒலிபரப்பு மற்றும் நாடாளுமன்ற விவகாரத்துறை இணை அமைச்சர் எல்.முருகன் வெளியிட்டார்.
அவர் வெளியிட்ட ஊடகம் மற்றும் பொழுதுபோக்கு பற்றிய புள்ளிவிவர கையேட்டில் இடம் பெற்ற தகவல்கள்: 1957 இல் 5,932 ஆக இருந்த பதிவுசெய்யப்பட்ட அச்சு ஊடகங்கள் 2025 இல் 154,523 ஆக அதிகரித்தது.
மார்ச் 2025 இல் 100% புவியியல் கவரேஜை டிடீஎச் சேவை அடைந்தது. அகில இந்திய வானொலி இப்போது இந்தியாவின் மக்கள் தொகையில் 98% ஐ அடைகிறது. 591 வானொலி நிலையங்கள் உள்ளன. 2004-05இல் 130 ஆக இருந்த தனியார் தொலைக்காட்சி சேனல்கள் 2024-25 இல் 908 ஆக அதிகரித்தது.
தனியார் எப்எம் நிலையங்கள் 2001 இல் 4 ஆக இருந்ததிலிருந்து 2024 இல் 388 ஆக உயர்ந்தன; இந்த அறிக்கை மார்ச் 31, 2025 நிலவரப்படி மாநில வாரியான பிரிவை வழங்குகிறது. சான்றளிக்கப்பட்ட இந்திய திரைப்படங்களின் எண்ணிக்கை 1983இல் 741 ஆக இருந்ததிலிருந்து 2024-25 இல் 3,455 ஆக உயர்ந்தது, 2024-25 இல் மொத்தம் 69,113 படங்கள் சான்றளிக்கப்பட்டன. ‘உள்ளடக்கத்திலிருந்து வணிகம் வரை: இந்தியாவின் படைப்பாளர் பொருளாதாரத்தை வரைபடமாக்குதல்’ – பாஸ்டன் ஆலோசனைக் குழுவின் அறிக்கை, எர்ன்ஸ்ட் & யங்கின் ‘இந்தியா என்று அழைக்கப்படும் ஒரு ஸ்டுடியோ’ , கைத்தான் & கோவின் ‘சட்ட நீரோட்டங்கள்: இந்தியாவின் ஊடகம் மற்றும் பொழுதுபோக்குத் துறை குறித்த ஒரு ஒழுங்குமுறை கையேடு 2025’ , இந்தியாவின் நேரடி நிகழ்வுகள் துறை குறித்த வெள்ளை அறிக்கை ஆகியவையும் வெளியிடப்பட்டன.