2026 சட்டமன்றத் தேர்தலில் திமுக – காங்கிரஸ் கூட்டணி நீடிக்குமா அல்லது புதிய அச்சு உருவாகுமா என்ற விவாதம் டெல்லி வரை எதிரொலிக்கத் தொடங்கியுள்ளது. இதற்குப் பின்னால் நடிகர் விஜய்யின் தமிழக வெற்றி கழகம் (தவெக) விடுத்துள்ள ஒரு அதிரடி “ஆஃபர்” இருப்பதாகக் கூறப்படுகிறது.
நம்பத்தகுந்த வட்டாரங்களின்படி, நடிகர் விஜய் தரப்பிலிருந்து காங்கிரஸ் தலைமைக்கு ஒரு பிரம்மாண்டமான தூது அனுப்பப்பட்டுள்ளது. அதில், “எங்களுடன் கூட்டணி அமைத்தால் காங்கிரஸிற்கு 100 தொகுதிகள் ஒதுக்கப்படும் மற்றும் ஆட்சியில் பங்கு அளிப்பதோடு துணை முதலமைச்சர் பதவியும் வழங்கப்படும்” என்று உறுதியளிக்கப்பட்டதாகத் தெரிகிறது.
இந்த அதிரடி ஆஃபர் தான் ராகுல் காந்தியை ஒரு தீர்க்கமான முடிவெடுக்க விடாமல் யோசிக்க வைத்துள்ளது. ராகுல் காந்தி தற்போது இரண்டு முக்கியக் காரணங்களை அலசி வருகிறார்:
திமுக-வுடன் தொடர்ந்தால் வெற்றி வாய்ப்பு பிரகாசமாக இருக்கும், ஆனால் ஆட்சியில் பங்கு (Power Share) கிடைக்காது.
விஜய்யின் தவெக-வுடன் கைகோர்த்தால், தமிழகத்தில் இழந்த செல்வாக்கை மீட்டெடுக்க 100 தொகுதிகள் ஒரு பொன்னான வாய்ப்பு. மேலும், விஜய்யின் செல்வாக்கு நாளுக்கு நாள் அதிகரித்து வருவதாக உளவுத்துறை அறிக்கைகள் தெரிவிக்கின்றன.
சமீபகாலமாக கரூர் சம்பவம் மற்றும் ‘ஜனநாயகன்’ திரைப்பட விவகாரத்தில், மாநில திமுக அரசும் மத்திய பா.ஜ.க அரசும் விஜய்யைப் பழிவாங்குவதாக ஒரு பிம்பம் உருவாகியுள்ளது. இது இளைஞர்கள் மற்றும் பொதுமக்களிடையே விஜய் மீது மிகப்பெரிய அனுதாப அலையை ஏற்படுத்தியுள்ளது.
காங்கிரஸின் இந்த இரட்டை நிலைப்பாட்டால் முதலமைச்சர் மு.க. ஸ்டாலின் மிகுந்த அதிருப்தியில் இருப்பதாகக் கூறப்படுகிறது. பலமுறை பேச்சுவார்த்தை நடத்தியும், காங்கிரஸ் பிடிகொடுக்காமல் இருப்பது திமுக தலைமைக்கு எரிச்சலை ஊட்டியுள்ளது.
இது குறித்து திமுக மூத்த அமைச்சர்கள் நம்மிடம் கூறுகையில், “காங்கிரஸ் போக வேண்டும் என்று நினைத்தால் தாராளமாகப் போகட்டும். அவர்கள் போட்டியிடும் தொகுதிகளில் தேர்தல் செலவு முதற்கொண்டு நாங்கள்தான் கவனித்துக் கொள்கிறோம். அந்தப் பணத்தை வைத்து எங்கள் சொந்த வேட்பாளர்களையே நிறுத்தி எங்களால் வெற்றி பெற முடியும்” என்று வெளிப்படையாகவே பேசத் தொடங்கியுள்ளனர்.
அரசியல் விமர்சகர்களின் கருத்துப்படி, ஒரு கட்சியின் முதல் வெற்றி என்பது தேர்தலுக்கு முன்பே அமையும் வலுவான கூட்டணியில்தான் உள்ளது. “தற்போதுள்ள கூட்டணியைச் சிதறாமல் வைத்திருந்தாலே திமுக தனது முதல் வெற்றியைப் பெற்றுவிட்டதாகக் கருதலாம். வாக்கு சேகரிப்பது என்பது அடுத்தகட்ட வேலை” என்று திமுக ஆதரவாளர்கள் தலைமைக்கு அழுத்தம் கொடுத்து வருகின்றனர்.
வாட்ஸ்அப் போன்ற செயலிகள் முடங்குவதற்கு முன்பே இந்த முக்கியத் தகவல்கள் அரசியல் வட்டாரத்தில் பரவி, பெரும் அதிர்வலைகளை ஏற்படுத்தியுள்ளன. விஜய்யின் ‘விசில்’ சத்தத்திற்கு காங்கிரஸ் செவிசாய்க்குமா அல்லது ‘உதயசூரியன்’ நிழலிலேயே தங்குமா என்பதுதான் தமிழகத்தின் மில்லியன் டாலர் கேள்வி!