ரஷ்யாவிடம் எண்ணெய் வாங்குவதை குறைத்து விட்டது இந்தியா – டிரம்ப்..!

மேலும், இந்தியா ரஷ்ய எண்ணெய் இறக்குமதியை “முழுவதுமாகக் குறைத்துவிட்டது”>

ஆசியாவில் சீன அதிபர் ஷி ஜின்பிங் உள்ளிட்ட தலைவர்களுடன் சந்திப்புக்காக ஏர் ஃபோர்ஸ் ஒன் விமானத்தில் புறப்பட்டபோது செய்தியாளர்களிடம் பேசிய டிரம்ப், சீன அதிபருடனான தனது பேச்சுவார்த்தை ஒரு “முழுமையான ஒப்பந்தத்தை” உருவாக்கும் என்று நம்புவதாகத் தெரிவித்தார். வர்த்தகம், தொழில்நுட்பம் மற்றும் மூலப்பொருள் கட்டுப்பாடுகள் தொடர்பாக அமெரிக்காவிற்கும் சீனாவிற்கும் இடையே நிலவும் மோதல், டிரம்பின் ஆசியப் பயணத்தின் முக்கியத்துவத்தை உயர்த்தியுள்ளதுடன், இரு உலக நிதி வல்லரசுகளும் வர்த்தகப் போருக்கு ஒரு முற்றுப்புள்ளி வைக்கும் ஒப்பந்தத்தில் கையெழுத்திட வேண்டிய கட்டாயத்தையும் ஏற்படுத்தியுள்ளது.

தென்கொரியாவின் ஜியோங்ஜுவில் நடைபெறவுள்ள ஆசிய-பசிபிக் பொருளாதார ஒத்துழைப்பு (APEC) உச்சிமாநாட்டின்போது டிரம்ப் மற்றும் ஷி ஜின்பிங் சந்திப்பு திட்டமிடப்பட்டுள்ளது. இதற்கு முன்னதாக, அமெரிக்கா மற்றும் சீனாவின் உயர்மட்ட பிரதிநிதிகள் சனிக்கிழமை கோலாலம்பூரில் வர்த்தகப் பேச்சுக்களை நடத்தினர். இதை அமெரிக்க கருவூலத் துறையின் செய்தித் தொடர்பாளர் “மிகவும் ஆக்கபூர்வமானது” என்று அழைத்தார். கருவூலச் செயலர் ஸ்காட் பெஸ்ஸண்ட் தலைமையிலான அமெரிக்கக் குழுவும், துணைப் பிரதமர் ஹெ லிஃபெங் தலைமையிலான சீனக் குழுவும் ஞாயிற்றுக்கிழமை பேச்சுவார்த்தைகளை மீண்டும் தொடங்கவுள்ளனர்.

மாஸ்கோவின் ரோஸ்நெஃப்ட் மற்றும் லுகோயில் எண்ணெய் நிறுவனங்கள் மீது தடைகளை அறிவித்த டிரம்ப், சீனா ரஷ்ய எண்ணெய் இறக்குமதியைக் குறைத்துவிட்டது என்றும், இந்தியா முழுவதுமாகக் குறைத்துவிட்டது என்றும் சனிக்கிழமை கூறினார். சினோபெக் உட்படச் சீன அரசுக்குச் சொந்தமான நிறுவனங்கள் ரஷ்யக் கச்சா எண்ணெயின் சில கொள்முதல்களை ரத்து செய்துள்ளதாக வெள்ளிக்கிழமை செய்திகள் தெரிவித்தன.

சீன அதிபருடன் ரஷ்ய எண்ணெய்க் கொள்முதல் குறித்துப் பேசுவாரா என்று செய்தியாளர்கள் கேட்ட கேள்விக்குப் பதிலளித்த டிரம்ப், ‘நான் அது பற்றி விவாதிக்கலாம். ஆனால் உங்களுக்குத் தெரியும், சீனா – நீங்கள் இன்று பார்த்திருக்கலாம் – ரஷ்ய எண்ணெய்க் கொள்முதலை மிக கணிசமாகக் குறைத்து வருகிறது, மேலும் இந்தியா கொள்முதலை முழுவதுமாகக் குறைத்து வருகிறது, மேலும் நாங்கள் தடைகளை விதித்துள்ளோம்’ என்று கூறினார்.

அமெரிக்க விவசாயிகளைக் கவனித்துக் கொள்ள விரும்புவதாகக் கூறிய டிரம்ப், விவசாயத் துறை குறித்து விவாதிக்க உள்ளதாகவும் கூறினார். மேலும், பெரும்பாலான ஃபென்டானில் (fentanyl) பீஜிங்கில் இருந்து வருவதாகக் கூறி, ஃபென்டானில் குறித்தும் விவாதிக்கப் போவதாகவும் டிரம்ப் கூறினார்.