நடிகை ஜெயசுதா தெலுங்கு, தமிழ், மலையாளம், கன்னடம் உள்ளிட்ட திரைப்படங்களில் நடித்துள்ளார். தமிழில் ரஜினி, கமல், விஜயகாந்த் ஆகியோருடன் நடித்துள்ளார்.
ஒருங்கிணைந்த ஆந்திராவின் காங்கிரஸ் தலைவரான ஒய்.எஸ்.ராஜசேகர் ரெட்டி முதல்வராக இருந்த போது நடிகை ஜெயசுதா காங்கிரஸில் இணைந்தார்.
இதையடுத்து செகந்திராபாத் சட்டமன்ற தொகுதியில் போட்டியிட வாய்ப்பு அளிக்கப்பட்டது. அந்த தொகுதியில் நடிகை ஜெயசுதா வெற்றி பெற்று எம்.எல்.ஏ. ஆனார். ஓய்.எஸ் ராஜசேகர ரெட்டியின் மறைவிற்கு பிறகு அரசியலில் இருந்து விலகி இருந்தார்.
பின்னர் 2016-ம் ஆண்டு தெலுங்கு தேசம் கட்சியில் சேர்ந்த அவர், 2019-ம் ஆண்டு அக்கட்சியிலிருந்து விலகி ஒய்.எஸ்.ஆர். காங்கிரஸ் கட்சியில் சேர்ந்தார். நடிகை ஜெயசுதாவிற்கு தேர்தலில் போட்டியிட ஒய்.எஸ்.ஆர். காங்கிரஸ் கட்சியில் வாய்ப்புகள் வழங்கப்படவில்லை. இதனால் விரக்தில் இருந்தார்.
இந்த நிலையில் நடிகை ஜெயசுதாவை பா.ஜ.க. கட்சியின் இணைப்பு குழு தலைவர் ஈட்ல ராஜேந்திரன் எம்.எல்.ஏ. பா.ஜ.க.வில் இணைய அழைப்பு விடுத்தார். ஐதராபாத்தில் நடந்த பொதுக் கூட்டத்தில் நடிகை ஜெயசுதா அமித்ஷா முன்னிலையில் பா.ஜ.க.வில் இணைவார் என கூறப்பட்டது. ஆனால் நடிகை ஜெயசுதா பா.ஜ.க.வில் இணையவில்லை.
இந்த நிலையில் நடிகை ஜெயசுதா தெலுங்கானா பா.ஜ.க மாநில தலைவர் கிஷன் ரெட்டியை சந்தித்தார். விரைவில் அவர் பா.ஜ.க.வில் இணையவுள்ளதாக தகவல் வெளியாகி உள்ளது. இதனால் தெலுங்கானா அரசியலில் பரபரப்பு ஏற்பட்டுள்ளது.