இது தொடர்பாக மத்திய சுற்றுச்சூழல், வனம், காலநிலை மாற்றத் துறை அமைச்சகம் வெளியிட்டுள்ள செய்திக் குறிப்பில் கூறியிருப்பதாவது: ‘தொழில்துறைகளுக்கான அனுமதி வழங்கும் முறையை அனைத்து மாநிலங்கள் மற்றும் யூனியன் பிரதேசங்களில் சீரமைக்கும் வகையில், 1981-ம் ஆண்டின் காற்று (மாசு தடுப்பு மற்றும் கட்டுப்பாடு) சட்டம் மற்றும் 1974-ம் ஆண்டின் நீர் (மாசு தடுப்பு மற்றும் கட்டுப்பாடு) சட்டத்தின் கீழ் அறிவிக்கப்பட்ட ‘சீரான இசைவு வழிகாட்டுதல்களை’ அரசாங்கம் திருத்தியுள்ளது. இந்த நடவடிக்கை நடைமுறைத் தாமதங்களைக் குறைப்பதையும், சுற்றுச்சூழல் நிர்வாகத்தை வலுப்படுத்துவதையும் நோக்கமாகக் கொண்டுள்ளது. கடந்த ஆண்டு வெளியிடப்பட்ட இந்த வழிகாட்டுதல்கள், ‘நிறுவுவதற்கான இசைவு’ (சி.டி.இ) மற்றும் ‘இயக்குவதற்கான இசைவு’ (சி.டி.ஓ) ஆகியவற்றை வழங்குதல், மறுத்தல் அல்லது ரத்து செய்தல் ஆகியவற்றிற்கான நாடு தழுவிய ஒரு சீரான கட்டமைப்பை வழங்குகின்றன.
ஒருங்கிணைந்த இசைவு மற்றும் அங்கீகாரம் ஒரு முக்கியமான சீர்திருத்தம் என்னவென்றால், ஒருங்கிணைந்த இசைவு மற்றும் அங்கீகாரத்திற்கான ஏற்பாடு ஆகும். மாநில மாசுக்கட்டுப்பாட்டு வாரியங்கள் (எஸ்.பி.சி.பி) இனி ஒரே விண்ணப்பத்தைச் செயல்படுத்தி, காற்று மற்றும் நீர் சட்டங்களின் கீழ் இசைவு மற்றும் பல்வேறு கழிவு மேலாண்மை விதிகளின் கீழ் அங்கீகாரம் ஆகியவற்றை உள்ளடக்கிய ஒருங்கிணைந்த அனுமதிகளை வழங்க முடியும். இது பலமுறை விண்ணப்பிப்பதைத் தவிர்க்கிறது, அனுமதி பெறுவதற்கான காலக்கெடுவைக் குறைக்கிறது மற்றும் அதே சமயம் கண்காணிப்பு மற்றும் விதிமுறை மீறலுக்கான ரத்து நடவடிக்கைகளை வலுவாகத் தக்கவைக்கிறது.
இந்தத் திருத்தங்கள் சுற்றுச்சூழல் பாதுகாப்பைப் பராமரிக்கும் அதே வேளையில், வேகமான மற்றும் திறமையான அனுமதி செயல்முறைகளை உறுதி செய்வதை நோக்கமாகக் கொண்டுள்ளன. மேலும், ‘இயக்குவதற்கான இசைவு’ (சி.டி.ஓ) புதுப்பிப்பதில் ஏற்படும் தாமதத்தால் தொழில்துறை செயல்பாடுகளில் ஏற்படும் நிச்சயமற்ற தன்மையையும் இது நீக்குகிறது.
சுற்றுச்சூழல் தணிக்கையாளர்கள் மற்றும் குறு, சிறு நிறுவனங்களுக்கான சலுகை செயல்முறையை விரைவுபடுத்த, மாநில மாசுக்கட்டுப்பாட்டு வாரிய அதிகாரிகளுடன் சேர்ந்து, ‘சுற்றுச்சூழல் தணிக்கை விதிகள் 2025’-ன் கீழ் சான்றளிக்கப்பட்ட பதிவுபெற்ற சுற்றுச்சூழல் தணிக்கையாளர்களும் தள ஆய்வுகளை நடத்த அனுமதிக்கப்படுகிறார்கள்.
அறிவிக்கப்பட்ட தொழிற்பேட்டைகளில் உள்ள குறு மற்றும் சிறு நிறுவனங்களுக்கு (எம்.எஸ்.இ), சுய சான்றளிக்கப்பட்ட விண்ணப்பத்தைச் சமர்ப்பித்த உடனேயே ‘நிறுவுவதற்கான இசைவு’ (சி.டி.இ) வழங்கப்பட்டதாகக் கருதப்படும். ஏனெனில், அந்த நிலம் ஏற்கனவே சுற்றுச்சூழல் ரீதியாக மதிப்பிடப்பட்டுள்ளது.
இடத் தேர்வு மற்றும் கட்டண முறை திருத்தப்பட்ட வழிகாட்டுதல்கள், இடத் தேர்வுக்கான கடுமையான குறைந்தபட்ச தூர அளவுகோல்களுக்குப் பதிலாக, அந்தந்த இடத்தின் சூழலுக்கு ஏற்ப மாற்றியமைக்க அனுமதிக்கிறது. இதன் மூலம் நீர்நிலைகள், குடியிருப்புகள் அல்லது பாதுகாக்கப்பட்ட பகுதிகளுக்கு அருகில் உள்ள சூழலுக்கேற்ப அதிகாரிகள் தகுந்த பாதுகாப்பு நடவடிக்கைகளை நிர்ணயிக்க முடியும்.
மேலும், மாநிலங்கள் மற்றும் யூனியன் பிரதேசங்கள் 5 முதல் 25 ஆண்டுகள் வரையிலான காலத்திற்கு ஒருமுறை மட்டும் ‘இயக்குவதற்கான இசைவு’ கட்டணத்தை வசூலிக்க அனுமதிக்கப்படுகின்றன. கட்டண மதிப்பீட்டில் குழப்பத்தைத் தவிர்க்க ‘மூலதன முதலீடு’ என்பதற்கான தெளிவான மற்றும் சீரான வரையறையும் அறிமுகப்படுத்தப்பட்டுள்ளது.
இந்தத் திருத்தங்கள், விதிகளைப் பின்பற்றாதது, சுற்றுச்சூழல் பாதிப்பு அல்லது தடைசெய்யப்பட்ட பகுதிகளில் அமைந்திருப்பது போன்ற நிகழ்வுகளில் இசைவை மறுக்கும் அல்லது ரத்து செய்யும் அதிகாரத்தைத் தக்கவைத்துள்ளன. இந்த புதிய கட்டமைப்பு, தொடர்ச்சியான கண்காணிப்பு மற்றும் நம்பகத்தன்மை சார்ந்த நிர்வாகத்தின் மூலம் ‘தொழில் செய்வதை எளிதாக்குவதற்கும்”சுற்றுச்சூழல் பாதுகாப்பிற்கும்’ இடையே சமநிலையை ஏற்படுத்துகிறது.’ என்று தெரிவிக்கப்பட்டுள்ளது.