அமெரிக்க முன்னாள் அதிபர் டொனால்ட் டிரம்ப், H1-B விசா விண்ணப்பங்களுக்கான கட்டணத்தை $100,000 ஆக உயர்த்தியிருப்பது, இந்திய தொழில்நுட்ப துறை ஊழியர்கள் மத்தியில் பெரும் கவலையை ஏற்படுத்தியுள்ளது.
இந்த கட்டண உயர்வு, அமெரிக்காவில் தங்கள் வேலைவாய்ப்பு, குடும்பம், மற்றும் எதிர்காலம் என அனைத்தையும் கேள்விக்குள்ளாக்கியுள்ளது. அதேசமயம், இந்த நடவடிக்கை அமெரிக்காவில் ஏன் எடுக்கப்பட்டது என்பதைப் பற்றிய ஆழமான புரிதலும் அவசியம்.
அமெரிக்க நிர்வாகத்தின் தரவுகளின்படி, கடந்த சில ஆண்டுகளில் சுமார் 50,000-க்கும் மேற்பட்ட அமெரிக்க ஊழியர்கள் பணிநீக்கம் செய்யப்பட்டுள்ளனர். குறிப்பாக, கொரோனா காலகட்டத்திற்கு பிறகு, தொழில்நுட்ப துறையில் இந்த பணிநீக்கங்கள் அதிகரித்துள்ளன. இதற்கு முக்கிய காரணம், அமெரிக்க நிறுவனங்கள் குறைவான சம்பளத்தில் வெளிநாட்டு ஊழியர்களை, குறிப்பாக H1-B விசா வைத்திருக்கும் இந்தியர்களை பணியமர்த்துவதே என்று டிரம்ப் நிர்வாகம் குற்றம் சாட்டுகிறது.
வெள்ளை மாளிகையின் அறிக்கையின்படி, அமெரிக்க நிறுவனங்கள் ஆயிரக்கணக்கான அமெரிக்க ஊழியர்களை பணிநீக்கம் செய்த அதே நேரத்தில், ஆயிரக்கணக்கான H1-B விசாக்களுக்கு ஒப்புதல் பெற்றுள்ளது. அமெரிக்காவில் கணினி அறிவியல் பட்டதாரிகளுக்கான வேலையின்மை விகிதம் 6.1% ஆகவும், கணினி பொறியியல் பட்டதாரிகளுக்கான வேலையின்மை விகிதம் 7.5% ஆகவும் உயர்ந்துள்ளது. இது மற்ற துறைகளை காட்டிலும் மிக அதிகம். இத்தகைய சூழலில், டிரம்ப் தனது “அமெரிக்கர்களுக்கு முன்னுரிமை” என்ற கொள்கையை அமல்படுத்தி, வேலைவாய்ப்பை உள்நாட்டு ஊழியர்களுக்கு உறுதி செய்ய முயற்சிக்கிறார். அதற்கு அவர் கையில் எடுத்த ஆயுதம் தான் H1-B விசா கட்டண உயர்வு.
H1-B விசா என்பது இந்திய தொழில்நுட்ப வல்லுநர்களுக்கு அமெரிக்காவில் பணியாற்ற ஒரு முக்கியமான நுழைவு வாயிலாக உள்ளது. கடந்த சில ஆண்டுகளாக, இந்த விசாக்களில் 71% முதல் 72% வரை இந்தியர்களுக்கே கிடைக்கிறது. இதன் மூலம், ஆயிரக்கணக்கான இந்தியர்கள் அமெரிக்காவில் அதிக வருமானம் ஈட்டி, தங்கள் குடும்பங்களுக்கு நிதி ரீதியாக ஆதரவளிக்கிறார்கள். இந்தியாவிற்கு அனுப்பப்படும் பணப் பரிவர்த்தனைகளிலும் இது முக்கியப் பங்கு வகிக்கிறது.
பெரும்பாலான இந்திய ஐடி ஊழியர்கள் அமெரிக்காவில் நல்ல வாழ்க்கைத்தரத்துடன், தங்கள் எதிர்காலத்திற்கு தேவையான செல்வத்தை சேர்த்து வருகிறார்கள். இந்த நிலையில், $100,000 கட்டண உயர்வு என்பது அவர்களுக்கு பெரும் நிதிச்சுமையை ஏற்படுத்தும். இந்த அதிகரித்த செலவை நிறுவனங்கள் ஏற்க தயங்கினால், இந்திய ஊழியர்களின் வேலைவாய்ப்பு பாதிக்கப்படலாம்.
டிரம்பின் இந்த கொள்கை, கூகுள், மைக்ரோசாஃப்ட், அமேசான் போன்ற முன்னணி அமெரிக்க நிறுவனங்களை இந்தியாவிற்கு மாற்றச் செய்யுமா என்ற கேள்வி எழுகிறது. தொழில்நுட்ப வல்லுநர்களை குறைவான செலவில் பெற இந்தியாவிற்கு வருவது லாபகரமானதாக தோன்றலாம்.
அமெரிக்க நிறுவனங்கள் ஏற்கனவே இந்தியாவில் பெரிய அளவில் தங்கள் அலுவலகங்களை ஏற்கனவே அமைத்துள்ளன. பணியாளர்களின் சம்பளம், அலுவலக செலவுகள் போன்றவை அமெரிக்காவை விட இந்தியாவில் மிகவும் குறைவு. எனினும், ஒட்டுமொத்த நிறுவனத்தையும் இந்தியாவிற்கு மாற்றுவது என்பது அவ்வளவு எளிதான காரியம் அல்ல. அமெரிக்க நிறுவனங்களின் முக்கிய சந்தை, வாடிக்கையாளர்கள் மற்றும் முதலீட்டாளர்கள் அமெரிக்காவிலேயே உள்ளனர். ஒரு நிறுவனத்தை முழுவதுமாக மாற்றுவது என்பது பல சட்ட மற்றும் நிர்வாகச் சிக்கல்களை ஏற்படுத்தும். தரவு பாதுகாப்பு மற்றும் தனியுரிமை சட்டங்கள் இரு நாடுகளிலும் வேறுபடுகின்றன.
எனவே, இந்த நிறுவனங்கள் இந்தியாவிற்கு முழுமையாக மாற உடனே வாய்ப்பு இல்லை. மாறாக, அவர்கள் தங்கள் செயல்பாடுகளை பன்முகப்படுத்துவார்கள். அதாவது, அமெரிக்காவில் இருக்கும் பணிகளை செய்வதற்குத் தேவையான குறைந்தபட்ச ஊழியர்களை மட்டும் அமெரிக்காவில் வைத்துக்கொண்டு, மற்ற பணிகளை இந்தியாவில் உள்ள தங்கள் கிளைகளுக்கு மாற்றுவார்கள். இது இந்தியாவின் “மேக் இன் இந்தியா” திட்டத்திற்கும், டிஜிட்டல் இந்தியா வளர்ச்சிக்கும் துணை புரியும்.
சிலர், கூகுள், மைக்ரோசாஃப்ட் போன்ற நிறுவனங்கள் இந்தியாவுக்கு வந்தால், இந்தியா வல்லரசாகிவிடும் என்றும், அமெரிக்கா நிதி நெருக்கடியில் சிக்கிவிடும் என்றும் கூறுகின்றனர். ஆனால், இந்த வாதம் ஒருதலைப்பட்சமானது. அமெரிக்கா உலகளாவிய தொழில்நுட்பத்தின் மையமாக உள்ளது. அதன் பல்கலைக்கழகங்கள், ஆராய்ச்சி நிறுவனங்கள், மற்றும் நிதி சந்தைகள் ஆகியவை உலகின் சிறந்த திறமையாளர்களை ஈர்க்கின்றன. வெறும் H1-B விசா கட்டண உயர்வால் அதன் பலம் குறைந்துவிடாது. எனவே இந்த கட்டண உயர்வால் அமெரிக்காவின் முன்னணி நிறுவனங்கள் இந்தியாவுக்கு சென்றுவிடும், அமெரிக்கா “போண்டியாகிவிடும்” என்பது ஒரு மிகைப்படுத்தப்பட்ட கருத்து.